Evel warlene e kinnig skipailh Dispak deoc’h 10 levr brezhonek embannet er bloaz-mañ hag o deus sachet hon evezh.
Savet e brezhoneg
![Skrivet gant Erwan Hupel](https://www.dispak.bzh/wp-content/uploads/2019/12/978-2-7368-0137-3-web-195x300.jpg)
Chuchumuchu, Romant, Al liamm, 56 p., 7€
Heuliañ a reer er romant buhez un tad, a ya war roudoù seizh Breton eus penn-kentañ an 20vet kantved, bet harzet gant an Alamaned e-toug ar Brezel Bed kentañ. Ganto e oa bet enrollet o mouezhioù e 1916 : an enrolladenn vrezhonek goshañ anavezet betek-henn. Piv e oa an dud-se? Petra a oa bet lavaret gante ? Ha ni Breton·ez·ed a-vremañ, petra a lavarfemp ?
Ul levr berr eo, leun a fent hag a droiennoù brezhonek plijus evel “Enkrezet evel ur c’harrad moc’h oc’h en em gavout e Pouldreuzig”, met diaes e c’hall bezañ heuliañ soñjoù an dudenn bennañ a-wechoù.
!['Veze ket dañset plinn !](https://www.dispak.bzh/wp-content/uploads/2019/12/golo1cadoudal.jpg)
‘Veze ket dañset plinn !, danevell-vuhez, An Alarc’h embannadurioù, 10€
Al levr-mañ zo savet diwar un enrolladenn bet graet e 2017 gant ar skrivagner Gege Gwenn. Kontañ a ra Jorj Kadoudal e eñvorennoù, testeni un den bet ganet e fin ar bloavezhioù ugent e Breizh en deus treuzet an XXvet kantved gant e holl emdroadurioù : sevenadur, yezh, endro, stourmoù liesseurt ar vro… Ur bern a zesker diwar-benn bed ar sonerezh hag an dañsoù, hag adkavout a reer un toullad tudennoù brudet a-hed an danevell.
Ur buhezskrid aes da lenn ha dedennus eo, un tamm dizurzh a-wechoù koulskoude e-giz ma c’hell bezañ kaozioù forzh peseurt den a rank kontañ e vuhez a-bezh da 90 vloaz…
![](https://www.dispak.bzh/wp-content/uploads/2019/11/golo1_100-rimadell-web.jpg)
100 rimadell evit ar vugale, rimadelloù, embannadurioù Sav-Heol. 4€
Sed aze ul levr a blijo d’an deskarded ha d’ar vugale koulz ha d’ar gelennerien ha kelennerezed, ouzhpenn d’e briz bezañ dister. Gant 100 rimadell, an darn vrasañ anezho ijinet gant Mark Kerrain, e vo peadra da gavout danvez dudi evit an holl. Renket int bet dre zanvez (bugale, tud, loened…) ar pezh a aesa ar c’hlask. Ouzhpennet eo bet tonioù ar rimadelloù war lec’hienn Kuzul ar brezhoneg.
![Skrivet gant Goulc'han Kervella](https://www.dispak.bzh/wp-content/uploads/2019/12/ADL_Gwenn.jpg)
Gwenn ar vorlaerez, embannadurioù Keit Vimp Bev, 48p. 6€
Rekourañs en XVIIIvet kantved. Gwenn, matezh e ti bourc’hizien a fell dezhi cheñch buhez. Ken gouest hag ar baotred eo. O kejañ gant Renan e kompreno ar pezh a fell dezhi ober : mont war vourzh ur vag ha bezañ ur vorlaerez… onest. Ur romantig plijus da lenn eo, skrivet brav.
Tennet eo al levr-mañ diwar rummad nevez levrioù Keit Vimp Bev “Aes da lenn”. Savet int evit an dud a zesk brezhoneg. Enno e kaver geriaoueg ha troioù-lavar displeget e brezhoneg, lizherennoù islinennet pa vez ur c’hemmadur ha steredennoùigoù evit merkañ ar gerioù benel e lod eus al levrioù.
Un distaol a 20% a zo war lec’hienn Keit vimp Bev war an holl broduioù, da implijout a-raok an 20 a viz Kerzu gant ar c’hod : NEDELEG
Troidigezhioù
![](https://www.dispak.bzh/wp-content/uploads/2019/11/20191108_093243-601x1024.jpg)
Tiny ha Tall : Gleipnir, Un avantur dic’hortoz, bandenn-dreset, embannadurioù Nidiad. 17€
Tiny ha Tall, daou haroz an istor a zo goved. Kaset int gant an doue Thor da vont da glask war-lerc’h aozennoù dic’hortoz evit krouiñ ar chadenn – Gleipnir hec’h anv – a harzfe ar bleiz Fenrir da zistrujañ ar bed. Tennet eo bet ar vandenn-dreset-mañ eus ur vojenn skandinavat. Krouet dindan stumm ur c’hoari video gant un Naonedad da gentañ eo bet lakaet da vandenn-dreset da c’houde ha troet e brezhoneg gant izili ar gelaouenn Nidiad.
Fent a zo gant an istor, ha plijus eo an tresadennoù. Daoust da se ez eus dibaboù yezh a c’hall bezañ dianav d’ul lodenn vras eus an dud. Un nebeud notennoù brezhonek a ra diouer neuze. Ret eo mont e darempred gant Nidiad evit prenañ al levr. Un eil a vo d’e-heul.
![](https://www.dispak.bzh/wp-content/uploads/2019/11/couv-unanet-adarre-web.jpg)
Unanet adarre, romant istorel, embannadurioù Hor Yezh. 10€
Romantig (126 pajenn) brudet Fred Ulhman “Reunion” zo deuet er-maez e 1971. Awenet eo bet gant istor personel an aozer a guitaas Alamagn e 1933 dres goude donedigezh Hitler er galloud. E Stuttgart emañ lec’hiet an istor, kêr c’henidik ar skrivagner. Danevelliñ a ra Uhlman istor ur vignoniezh don ha fromus etre daou grennard er bloavezhioù 1930. An eil, Hans Schwarz, mab ur familh vourc’hiz yuzev staliet mat e kêr, egile, Konradin Graf von Hohenfelds, hêr unan eus tiegezhioù noblañs koshañ, pinvidikañ hag enorusañ Alamagn. Dispartiet e vo an daou vignon gant ar barrad kasoni ha sotoni euzhus a lakaas Europa war he genou d’ar mare-hont.
Skrivet eo al levr en ur yezh plaen ha klasel, puilh hag aes da lenn. Un oberenn a vez lennet buan hag a c’hall bezañ studiet forzh aes er skol. Lakaet eo bet e brezhoneg diwar ar saozneg gant Bernard Géry a-drugarez da brogramm treiñ lennegel Kuzul-Rannvro Breizh.
![](https://www.dispak.bzh/wp-content/uploads/2019/11/couv-canterville-web.jpg)
Tasmant Canterville, danevell faltaziek, embannadurioù Hor Yezh. 8€
Tasmant Canterville a gont istor Sir Simon Canterville, un tasmant a blij dezhañ ober troioù-kamm da annezidi ar c’hastell. A-hed ar c’hantvedoù eo bet boas da spontañ an dud gant e itrikoù. Siwazh dezhañ, ur familh nevez o tont eus ar Stadoù-Unanet, ar re Otis, en em stalio du-hont. Ha diaes e vo dezhañ spontañ ar re-mañ.
Goude troidigezh Poltred Dorian Grey, setu un eil levr eus ar skrivagner iwerzhonat mil vrudet Oscar Wilde e brezhoneg. Ul levr berr (80 pajenn) ha farsus a zo aes da lenn evit krennarded pe deraouidi.
Evit ar vugale
![](https://www.dispak.bzh/wp-content/uploads/2019/11/skonsig-1024x901.jpg)
Skoñsig ha Ruflig, embannadurioù al Lanv 10€
Heuliañ a reer istor Skoñsig ar skoñs hag e vignon muiañ-karet, an neñneñ Ruflig. Evel kein ha roched eo an daou geneil. Siwazh e c’hoarvezo un dra spontus da Ruflig. Dre chañs e vo skoazellet an daou vignon. Ul levr berr da lenn, troet diwar an iwerzhoneg, evit deskiñ gerioù moutik ha moumoun d’ar re vras ha d’ar re vihan.
![](https://www.dispak.bzh/wp-content/uploads/2019/12/lulu-hag-an-noz.jpg)
Lulu hag an noz, embannadurioù Keit Vimp Bev, 8€
Penaos chom hep kaout aon rak an noz ? Diaes eo pa vezer bihan. Gant Lulu ez eus ur sekred ken burzhudus hag efedus. An istor-mañ a zo da lenn d’ar re vihan a-raok mont da gousket, moutig-tre eo an tudennoù ha flour eo livioù an tresadennoù. Peadra d’ober hunvreoù kaer bemnoz !
![Skrivet gant Katia Wolek, treset gant Julien Maos ha troet gant R.J Kernoa](https://www.dispak.bzh/wp-content/uploads/2019/12/timilenn_golo_levr_sekred_ar_chazh_katia_wolek_julien_maos_brezhoneg_le_secret_du_chat_bzhg.jpg)
Sekred ar c’hazh, embannadurioù Timilenn, 15€
Boris zo ur gov en ur gêriadenn vihan. E-unan emañ o chom p’en em gav ur gazhez wenn en e di. Homañ a guzh ur sekred spontus dezhañ. Ha dont a raio hi a-benn d’en em dennañ eus he gwallavel a-drugarez da sikour Boris ?
Sed aze un istor klasel aes da lenn ha da gompren. Aesoc’h e vo al lenn d’ar vugale a-drugarez d’ur skritur brasoc’h, etrelinennoù brasoc’h ivez ha d’ar c’heriaoueg a gaver e fin al levr. Gallout a raint heuliañ o araokadennoù zoken a-drugarez d’ar pennadoù berr a c’haller merkañ e deroù al levr.
Levrioù brezhonek all zo bet embannet er bloaz-mañ. Kavet e vezont war lec’hiennoù kuzul ar brezhoneg, klask, pe lenn.electre. Gouelioù laouen deoc’h holl ! 🎄
Piv on-me ?
Ar Skipailh
Piv a gaver a-dreñv d’an anv ar Skipailh ?
A-wechoù eo tud a skriv ur pennad asambles, gwechoù all, tud ha n’hallont ket reiñ o anv. Atav o toujañ ouzh Karta ar gelaouenn.